ഇരിയ: കാഞ്ഞങ്ങാട്-പാണത്തൂർ സംസ്ഥാനപാതയിലെ മുട്ടിച്ചരലിൽ സ്വകാര്യ ബസും ടിപ്പർ ലോറിയും കൂട്ടിയിടിച്ച് ആറു യാത്രക്കാർക്ക് പരിക്കേറ്റു. സാരമായി പരിക്കേറ്റ ദേശീയ വടംവലി കോച്ച് പരപ്പ കനകപ്പള്ളി സ്വദേശി ഷൈജൻ ചാക്കോ(53)യെ മാവുങ്കാലിലെ സ്വകാര്യ ആശുപത്രിയിലും മറ്റു യാത്രക്കാരെ കാഞ്ഞങ്ങാട്ടെ ആശുപത്രിയിലും പ്രവേശിപ്പിച്ചു.
ഇന്നലെ രാവിലെ കാഞ്ഞങ്ങാട് നിന്ന് പാണത്തൂരിലേക്ക് പോവുകയായിരുന്ന ലീഡർ ബസാണ് ടിപ്പർ ലോറിയുമായി ഇടിച്ചത്. മറ്റൊരു ബസിനെ മറികടക്കാനുള്ള ശ്രമത്തിനിടയിലായിരുന്നു അപകടമെന്നാണ് സൂചന. ബസിന്റെ ഒരു വശത്താണ് ലോറി ഇടിച്ചത്.
ഇടിയുടെ ആഘാതത്തിൽ ബസ് റോഡിൽനിന്ന് തെന്നി സമീപത്തെ കുറ്റിക്കാട്ടിലേക്ക് കയറിയിരുന്നു. അമ്പലത്തറ പോലീസ് സ്ഥലത്തെത്തിയാണ് ബസും ലോറിയും സ്ഥലത്തുനിന്ന് നീക്കിയത്.